ភ្នំពេញ៖ ប្រមុខរដ្ឋស្ដីទីបានផ្ទេរចៅក្រម និងព្រះរាជអាជ្ញា ចំនួន៨នាក់ទៅកាន់សាលាដំបូងខេត្តកែប បន្ទាប់ពីសាលាដំបូងទី១នៃខេត្តនេះត្រូវបានបង្កើត និងដាក់ឱ្យដំណើរការនៅចុងខែកញ្ញានេះ។

ក្នុងរាជក្រឹត្យដាច់ដោយឡែកចំនួនពីរចុះថ្ងៃទី៩ កញ្ញា ដែល EAC News ទើបទទួលបាន ប្រមុខរដ្ឋស្ដីទីសម្ដេចវិបុលសេនាភក្ដី សាយ ឈុំ បានសម្រេចផ្ទេរចៅក្រម៥នាក់ និងព្រះរាជអាជ្ញាម្នាក់ ពីខេត្តឧត្តរមានជ័យ រតនគិរី ស្ទឹងត្រែង ព្រះវិហារ និងប៉ៃលិនឱ្យមកកាន់កិច្ចការនៅសាលាដំបូងខេត្តកែប ក្នុងនោះក៏បានតែងតាំងព្រះរាជអាជ្ញា២នាក់ថែមទៀតដើម្បីឱ្យមកធ្វើការនៅសាលាដំបូងថ្មី នៃខេត្តកែបផងដែរ។

យោងតាមព្រះរាជក្រឹត្យចុះថ្ងៃទី១៣ មេសា ឆ្នាំ២០២១ ព្រះករុណាព្រះបាទសម្ដេចបរមនាថ នរោត្តម សីហមុនី ត្រាស់បង្គាប់ឱ្យដាក់ដំណើរការសាលាដំបូងខេត្តកែប ចាប់ពីថ្ងៃទី២៤ ខែកញ្ញា ឆ្នាំ២០២១ តទៅ៕